11 يناير 2013 23:37
(صويلح وزوجته فطوم وابنتهم سلامة)
سلامة: أبوي.. والله أمس كشششخة.. جان زين أنت موجود.. شو سوت يدووه!!
فطوم: عسب تصدق أن امك مب صاحية!! ما شفتها شو سوت في مباراة أمس.. صدق مب صاحية.
صويلح: فطوم آحترمني نفسج.. عيب عليج. ما يسوى عليها مسكينة خليها تتونس.
فطوم: بذمتك هاي فعايل عقال؟
صويلح: ليش شو سوت؟
فطوم: مو أمس مباراة الإمارات وعمان ومباراة البحرين وقطر في نفس الوقت؟!
صويلح: زين ندري.. شو يعني؟!
فطوم: عاد أمك ما قدرت تتابع مباراة الإمارات بدون ربيعتها سبيجه.. وسبيجه تبغي تشوف مباراة البحرين، تخيل أمك شو سوت؟
صويلح: يا حرمة تراج مصختيها.. شو سوت؟!
فطوم: أمك يابت تلفزيون ثاني وحطته في المجلس.. والعيايز تابعو المباراتين في نفس الوقت!! وأمك تشجع الإمارات وفي نفس الوقت تشجع البحرين.
سلامة: أبوي.. مو بس جيه.. يدووه رمست ويا ربيعتها زليخه في عمان بالتلفون بين الشوطين..
فطوم: شفت.. مو أقول لك.. على كل الأصعدة.
صويلح: ماشاءالله عليها الوالدة.. تحب الفرح. الله يحفظها.
فطوم: صدق والله!.. مستانس على أمك؟!
صويلح: وليش ما أستانس؟! وإنتي أصلا ليش منشغله فيها وايد؟ الحرمة مجلسها بعيد عنج.. وما تي صوبج.. خلاص ريحيني وريحي عمرج.
فطوم: وين بعيد عني!! كله حشره. اصواتهم توصلني هني في غرفتي.. وين اسير بعمري. الحين بتلعبون في النصف النهائي.. والحشرة بتزيد.
سلامة: الله.. حماااااس. حبتين.
فطوم: شفت.. حماس ما شاء الله. هم يتحمسون وأنا أجن.
صويلح: عيل خلاص. باخذها البحرين. عسب ترتاحين.
فطوم: شووه.. البحرين؟!
صويلح: هي البحرين.. أمي تبغي تسير البحرين. ويوم درت بالحريم الي بيسيرن يشجعون قالت سجل اسمي وياهم.
فطوم: وإنت صدق بتوديها؟
صويلح: ليش لأ!.. وايد حريم سايرين. يقولون ست طيارات وشي مشجعات إمارتيات.
سلامة: الله يخليج أمايه.. الله يخليج خلنا نسير كلنا. والله كشخة.
فطوم: وين تسيرين؟! إنتي خبلة. يا الله ما خدينا من هالعيوز إلا الخبال. ريلي وعيالي تخبلو.