19 يناير 2011 23:04
سلامة: يدووه،، شفتي سبيت خاطر؟
أم صويلح: وين،، ويييين؟
سلامة: هني يدووه،، في البلاك بيري،، البنات والاولاد حاطين صورته.
أم صويلح: هييي، عقب ما تعور،، صح!
سلامة: هيي،، وحليله،، ما أدي من وين يابو صوره حتى وهو في المستشفى.
أم صويلح: بغيت أموت يوم شفت الدم في ويه عقب ما دق راسه في راس العراقي.
سلامة: ما شفت الدم.
أم صويلح: أصلا هم في التلفزيون،، ما طولوا المشهد،، غيرو الصورة بسرعة،، شكله كان فضيع،، سووله 10 غرز بسبب هالجرح!
سلامة: حراااام.
أم صويلح: وحليلك يا سبيت ما تستاهل والله،، عشان تعرفون إن الكورة مب سهلة،، تحرون السالفة سهلة.
سلامة: أنا اعرف إنها مب سهلة.
أم صويلح: أنا اقصد امج النكدة،، يوم تستهين بتعب عيالنا في الملعب وتستهين بفرحتنا وتستهزأ بحزننا على نتايج منتخبنا،، خلها تشوف الشباب شو يسوون في أعمارهم.
سلامة: يدووه،، الوالدة تسولف،، تحب تغايضج.
أم صويلح: ماحد يغايض في هالسوالف،، هالسوالف فيها دم،، إنتي ما شفتي دم سبيتوه في الملعب،، بتعرفين عقبها شوو يعني سوالف في هالمواضيع.
سلامة: صدق يدووه،، سبيت بيعتزل خلاص!
أم صويلح: الحمدلله،، الريال غير رأيه، وقال إنه إذا المنتخب طلبه ما بيرده، عشان تعرفون بس إن عيالنا ريياييل، وأي شي يرفع إسم بلادهم ما بيتأخرون عنه.
عدد اليوم
