مبروك ياشباب.. مبروك أخيراً قدروا يطبقون الفيديو عندنا قبل ما ينتهي الدوري بخمس جولات، ورغم أنهم وعدونا يطبقونه في أول الموسم بس مب مشكلة المهم أنهم أخيراً عرفوا كيف يطبقونه!
بس تعال مب كأن اللي طلع وتكلم عن الفيديو واحد مفروض أنه في الاتحاد اللي طاف؟ أقصد كان مختفي من يوم ما صرحوا الربع في حملتهم الانتخابية أنه كثرة الطبابيخ تخرب الطبخة.
ما علينا مب مشكلة كل شي يستوي هالأيام بس شو سالفة العناوين الرنانة حق الفيديو وتطبيقه، وأنتوا تعرفون أنكم متأخرين وبدال ما تعتذرون عن التأخير وأنكم ما كنتوا على وعدكم طلعتونا بسوالف يديده أنه التشريعي الدولي يعمم الاختراع على العالم وأن التقنية بتغير وجه الكرة في دورينا ودول العالم!
هود هود صاحبنا شو ياك ؟ من زمان ما تكلمت يوم تتكلم تعطينا كل صاروخ أقوى من الثاني.. أي عالمية وأي اختراع والعالم يستعمله من سنتين ما يصير تقصون عالناس تراها متابعه وتشوف مباريات الدوريات العالمية.
بعدين أي اختراع الله يحفظك ويهديك وهو ياينك عن طريق شركة وبما إنك قلت إنكم اخترتوا وحده من ثلاث شركات وكانت الأفضل كسعر في العالم، ومادري كيف قارنت بأسعار العالم بس مب مشكلة القصد أنك مطبقنها عن طريق شركة يعني ما فيها اختراع ولا غيره، خفوا علينا يا الربع ترى المبالغة اللي تسوونها زادت عن حدها وكلنا نتابع وندري أنكم أصلاً متأخرين 6 شهور في التطبيق ولا فيه اتحاد عالمي على قولتك بيتأخر في تطبيق كلامه هالمده إلا إذا كنتوا متعمدين ما طبقونه.
بعدين تعال يالطيب الحين تزعلون إذا حد شكك في التحكيم من الكوارث اللي الكل يشوفها ومن أيامك ترى مب من الحين عشان ماتبري نفسك، فهل كيف على قول سعد بن عاقول تقوم انته بالتشكيك في التحكيم وتقول إنكم بتراقبون السياره بكاميرات صوت وصوره عشان النزاهة
الحين حلال عليكم وحرام عالمحللين.. استوت السالفه نزاهة!
ما توفقتوا يا اتحادنا الموقر تراكم في الرسايل اللي طلعت من المؤتمر الصحفي، وياريت تتداركون وضعكم ترى السالفة مصخت ووصلت أنه أي شي تتكلمون فيه على قول ربعنا السعوديين تجيبون العيد فيه.
اقترح تسوون لجنة تجارب أداء بما أنكم تعودتوا عاللجان تختص بالتصريحات الصحفية ودراسة شعور الوسط الرياضي وعدم إحراج أنفسكم أكثر وأكثر مع كل اجتماع أو قصة شعر أو حديث عن التحكيم والاستراتيجيات وحوكمة وسقف.
ويا صديقي انته وياه ياليتكم ساكتين.
عدد اليوم
