كرة طائرة للسيدات

من أيام كأس الخليج وأنا مقاطعة الرياضة، ما بغيت اخرب فرحتي بالكأس بخيبة محلية جديدة، قررت في خاطري أعتزل الرياضة والتشجيع وأنا في قمة مجدي؛ لكن الأمور ما تسير بالطريقة الي نبغيها دوم؛ من يومين جتني ''أم عبدالله'' مشتطتة -كالعادة- وتقول لي قومي وياي بنسير مباراة كرة طائرة في نادي الجزيرة؛ عاد أنا احيد ''ام عبدالله'' زين منها تعرف كيف يسجلون الهدف في كرة القدم فما بالكم بلعبة كرة الطايرة! طبعاً فاجأتني الدعوة، وعقب الرمسة ظهر المستور· الله يسلمكم ''أبو عبدالله'' عنده ربيع يشتغل في نادي الجزيرة، وخبره عن البطولة الدولية للسيدات اللي منضمنها نادي الجزيرة وأنه في سحب على سيارة؛ هني عرفت السالفة، الحرمة تبغي تفوز بالسيارة، وخذيتني تتسلى بدل ما تيلس بروحها؛ المهم سرنا وياها -ما حبيت اكسر بخاطرها- وبصراحة أني موول ما ندمت، لأني فعلا استانست، والسبب طبعا مب صحبة ''أم عبدالله'' ولكن لعدة أسباب، خلتني أحضر باقي المباريات عقب، وإليكم بعضها: السبب الأولي، أني أول مرة في حياتي أدش نادي في البلاد، تصدقون عاد أن بيتنا قريب وايد من نادي الجزيرة لكن عمري ما دشيته، ما توقعته حلو جي، وأنا على المدرج أتابع المباراة كان خاطري أيي هالمكان كل يوم· السبب الثاني، الحضور النسائي وايد شجعني، خصوصا أن اغلبهن مبرقعات، لكن هذا ما منعهن يحضرن ويشجعن· السبب الثالث، الحريم اللي يلعبن، طوال ماشالله عليهن، أنا في حياتي ما شفت حريم جي! طبعا هاي فرصة نشوف شي ما نشوفه دوم· السبب الرابع، إني حبيت منتخب كوبا وبدون سبب، صدقوني مالي علاقة بكاسترو، وهذا شجعني احضر المباراة النهائية بين كوبا وهولندا، والحمدلله كوبا فازت، و''أم عبدالله'' لا حصلت السيارة ولا فاز فريق الشقر اللي كانت تشجعه· ام صويلح