تلفزيون بلازما 100 بوصة

فطوم (زوجة صويلح): ياربي سترك ورضاك،، وين اودي بعمري،، مب كفاية العيوز وخبالها،، وأحين بعد بشكارتها. أم صويلح: بخبرج،، انتي موووول،، مووووول ما يخصج ببشكارتي،، وبعد ما يخصج فيني،، أنا حرة،، دام إني ما ييت غرفتج،، هذا بيتي وأنا حرة أسوي الي أباه. سلامة: يدووه،، شو بلاج،، ليش معصبة؟ أم صويلح: شوفي امج هالنحيسة،، واقفتلنا مثل العظمة،، عافانا الله،، لمتى بتحملها؟ فطوم: عشتوو،، احين إنتي متحملتني! عيل أنا شقول؟ سلامة: ما فهمت شي،، ارجوكم،، هدو شوي وخبرني شو مستوي؟! فطوم: سكت وكليت تبن يوم يدتج يابت ربيعاتها البيت في كل المناسبات الرياضية، وتحملت،، لكن توصل مواصيلها تجمع لي بشاكير الفريج في بيتي يطالعون مباريات الهند واستراليا! أم صويلح: وين البشاكير،، ليييش الكذب؟ فطوم: والله،، تقصين علي،، عيل هالتلفزيون الي كبر شاشة السينما يمكن 100 بوصة،، حق شو يايبتنه؟ أم صويلح: ما شووف،، حرمة عودة وما تشووف،، شريت تلفزيون عود عشان طالع عدل،، شوووه،، حرام يعني؟! سلامة: حرام الوالدة،، ظلمتيها. فطوم: صخي إنتي،، أنا سامعتنها تقول حق بي بي،، خبري ربعج ييون. أم صويلح: وشو فيها يعني،، مب هايول شركائنا في التنمية،، بتخالفين قول الحكومة،، مو من حقهم يطالعون مباراة منتخبهم؟! إنتي لمتى بتمين جي تحبين النكد؟ فطوم: ما حد منعهم،، بس مو في بيتي. أم صويلح: أولا هذا مب بيتج،، وثانيا قطر بكبرها خصصت مباراتها الافتتاحية لصالح الجوعى في العالم،، وإنتي يا الشرية مستكثرة عليهم يطالعون مباراة منتخبهم في مكان وسيع؟ فطوم: يعني انتي مب كفاية هالحشرة الي سويتيها أمس مع الافتتاح،، بعد تبغين تعليني كل أيام البطولة؟ أم صويلح: واليوم بعد بتلعب الكويت وعقبه الاردن وسويا،، وتراج بتتحملين وايد، كل يوم دولة خليجية أوعربية بتلعب،، وتعرفين،، ماحب اطالع المباريات روحي. فطوم: يا ربييي،، وين اسير بعمري! أم صويلح: إنتي استريحي: كل أمورنا بتكون طيبة،، ولج هدية مني لو خذينا الكأس يا فطوم. بي بي: وأنا بعد، بييب هدية مالش انتي لو الهند خذت الكأس.