السفر قرب

بما أنه ''السفر قرب·· والسفر حان طاريه''·· فأنا هاليومين مشغولة وايد في تجهيزاته؛ وبما أني من مشجعي الرحلات المحلية، فقد واجهت هذا الصيف عراكاً صعباً مع ''فطوم'' و''سلامة'' اللي قرروا الاتجاه شمالاً، أبعد عن الشمالية -رأس الخيمة والفجيرة-، قرروا السفر إلى ''بانكوك''· كانت المعركة (حامية الوطيس) لكن هم اللي فازوا، وخصوصاً بعد أن استسلمت لهم يوم قالوا بيسوون لي كشف في المستشفى وبيتطمنون على صحتي، وإن النتائج تظهر في يوم واحد، وما بتعب وأنا أتريا دوري، ووايد أشياء قالوها لين وافقت لكن بشروطي·· وأهما إني ما بسير فندق ماااااا داني الفنادق، خليتهم يحجزون شقة، عشان أقدر آخذ ''بي بي'' وأغراضي، اللي مستحيل تكفيها غرفة· عاد أنا مول ما سافرت قبل هالبلاد، حدي في الطيارة ثلاث ساعات، والحين لازم أتحمل أكثر عن ست ساعات، ما عليه دلتي مالت القهوة بتسدني؛ لكن الأهم ما بعد الوصول، وهذا اللي سوى المشكلة؛ ''امول'' ربيعتي خبرتني إن هالبلاد مول ما فيها شي يستاكل، وحذرتني ما اتهور وآكل شي عندهم؛ عاد أنا مول ما اتحمل، وعشان جي شريت يونية عيش (عشرين كيلو)، سشوي؟، وين اضمن هالنوع هناك، وشلينا جواطي حليب الرينبو، والجبن الكرفت، وجهزنا البهار كله، والود ودي أشل اللحم وياي، بس قالوا ما يصير، اكتفيت بقواطي التونة، وقلنا بناخذ السمك من هناك، ما لنا غيره· وأكيد باخذ الكمبتوتر مالي، عشان أخبركم عن مغامراتي في ''بانكوك''، ترا ''سلامة'' خبرتني أن ما عندهم دقم بالعربي· كل هالأغراض ما تسوي وزن، وتراني سألت وعرفت أنه لي 30 كيلو، و''بي بي'' نفس الشي، وعشان جي ما خبرت ''فطوم'' بسواتي، وناوية أخليها أمام الأمر الواقع في المطار·