? نصيحة غذائية: تبا تضعف كل بقياس ولا تحاتي، تبا تمتن كل في نصاص الليالي!
? نظرة ونظرة: في ناس تطلب أكلها من منيو المطاعم، وفي ناس تطلب أكلها مثل اللي في صحون الأوادم!
? السؤال عن الحال: حد ينشد عنك، وحد يتنشد عنك، وحد مب نشاد عنك!
? حساب دقيق: الناس اللي اتسويلك ألف حساب، حسبتكم عدلة ولا كلك؟
تجارة طفولية: أصعب أنواع التجارة في زمن الطيبين: إذا كان شريط الفيديو مالنا صغير ومال يرانا كبير!
? الانطباع المبدئي: لا تتسرع في إطلاق أحكامك على الآخرين، يمكن الشارع فيه رادار يزخ على ستين!
? نظرة تصحيحية: الناس اللي مب شايفه خير، يبالكم عدسات طبية!
? عناء في غير محله: شو سالفة الناس اللي تتعنى للقرية العالمية وآخرتها تتعشى في كنتاكي القرية!
? اتصال هاتفي: في ناس يوم ترمس في التلفون تيلس في مكان واحد، وناس يوم ترمس في التلفون تحوط وتخم البيت ساير ياي!
? العتب على النظر: الجملة اللي زيدت نسبة السمنة في البلاد: «مب من زود متنك عشان تسوي رجيم!»
? أساسيات السواقة: الناس اللي تيلس عدالك في السيارة وانته تسوق ثلاثة أنواع:1- يتعلق في الهاندل 2- يدح بريكات 3- أو تقوله «تعال سوق بدالي بعد!».
? عشق العيون: ياما مطاعم يديدة فتحت ونتهلعها (من الهلاعة وهي الشراهة في الأكل) ويوم نسير لها يطلع الأكل بس شكل!
? حقيقة الإنسان: كل ما زادت نسبة غرورك افتح كيمرة تلفونك اللي جدام!
? آداب الزيارة: قول للناس اللي تبا تدخل في حياتك «أول بادي ضربوا جرس!»
? زيارة مفاجئة: متى ما زارني طيفك.. سويت عمري ما أشوفه!
? أساسيات الحمية: ما باكل بس بطعم.. ومناك المغراف ساير ياي!
? وجبة جديدة: على كل مطعم يديد لازم تسمع «بنحطه في اللسته»!
? ناس وناس: ناس تفهمها وهي طايرة.. وناس تفتر في دايرة!