الخميس 28 مارس 2024 أبوظبي الإمارات
مواقيت الصلاة
أبرز الأخبار
عدد اليوم
عدد اليوم

الساخرون

19 يوليو 2008 23:01
حنظل بو شقية: مبروك مبروك يا بنتي· مبروك ما ياكم أم العيس· تتربّى في عزكم وتكبر وتفرحون فيها وفي اخوانها إن شاء الله··· شو بتسمونها الصغيرونة؟ ؟ شقية: الله يسلمْك ويخليك ذخر إن شاء الله يا بويه، لا خليت منك، ما أدري يا بوية والله، أنا اخترت اسم وايد حلو وفي خاطري من زمان وحلمت به أمي· يَتْني في المنام (الله يغفرلها) ووصتني به، بس ما أدري عن عباس شو بيقول!· ؟ عباس: السلام عليكم عمي شْحالك إلاّ بخير، طيّب؟، أسمعكم تتشاورون على اسم حق الصغيرونة، ما يحتاي أنا مختار الاسم من أول ما عرفت إنه أم العيس حامل ببنت، الاسم عندي وأنا بوهندي، هذا الاسم اللي بييب لها الحظ والسعد في حياتها كلها وحقنا بعد!!!· ؟ شقية: زين عاد ما خبرتنا شو الاسم اللي اخترته ما قلت، شو لغز؟!· ؟ عباس: لا لغز ولا شي، هو هذا ما شيْ غيره: ''نانسي''!!!· ؟ حنظل بو شقية: معصي وأنا حنظل، صدق ما تستحي على ويْهَك!، ما عليج منه يا شقيه، اللي تقولينه هو اللي بيمشي وبَسْ!!!· ؟ شقية: بويه عيّن من الله خير، ما يحتاي إتْعصِّب هالكثر، فديتك، شْوَيْ شْوَيْ على عمرك، عندك سكر، أخاف بعد لا يرتفع عليك ونحن بعدنا توّنا ما فرحنا بالصغيرونة!· ؟ حنظل بو شقية: شو اموصيتنج المرحومة أمِّج تسمْين بنيّتج؟!، يالله خبريه هالخفيف جليل الحيا، ياالله شو تتريّين؟!!!· ؟ شقية: هاااا··· والله يا بويه ما أدري شو أقولك، بس إنت تدري زمانا غير زمانكم، والحين غير الناس يسمون أسامي كشخة يديدة، خفيفة مب غلجة شرات أسامي هل أول، أنا قلت بسميها ''هيفا''، ما أدري!!!· ؟ حنظل بو شقية: هذا إنتو متوالفين وخالصين!، ما حيدكم إنتي وياه تتفقون على شيْ مرَّه، أنا هبابي إلا أفازع وأحايز بينكم إتقول ''جنْي وعطبة''، شْياكم الحين وتولمتوا على إسم البنية؟!، نانسي مدري شسمْها هاذيج الثانية هَنا ولَّهْ هيفا ولّة مَدري طروب؟!، ما شيْ فرق وايد بينهن···هييه!، هذا طرْق آخر الزمان يا حنظل!!!· ؟ شقية: بويه، لا تكبر السالفة على شيْ ما يرزا، إلاّ اسم تراه!· ؟ حنظل بو شقية: هيفا هاااا؟!، منو عمتج ولَّه خالتج اسمها هيفا؟!، وهذا ريلج بعد ما قصّر بيسمّي نانسي، شو مشكلتكم، شو ياكم ما أدري، شو اللي خبَّلكم ما أعرف؟!، تعالي أخبرج انتي يا العاقلة الرزينة ما قلتي أمِّج اموصيتنج تسمْين اسم غاوي وزين، هو هذا الاسم الغاوي: هيفا؟!، إنتي متأكدة إنها أمج اللي شفتيها في المنام ولَّه حد غير، إنتي متأكدة خبريني؟!، ما حيد أمِّج لحقت عليهن، من وين عرفتهن، وين شافتهن أبا أعرف؟!!!· ؟ عباس: يا عمي الله يهديك، ما فيها شيْ، بعد الواحد لازم يغيّر· الدنيا كلها تغيّرت والناس تغيّرت، ما بقى حد الحين ما لحقه شيْ من رياح التطور والعولمة، والأسامي مثلها مثل غيرها، شو بعد!!!· ؟ حنظل بو شقية: خِسَّ الله هالشور، صدق اللي قال: ''ما أردى من المربوط إلاّ المفتلت''!، والله وهذا أنا حلفت، دامنَّهْ هذا الراس يشم الهوى ما خليتكم تسمون البنت على هواكم يا مسودين الويْه إنت وحرمتك، وغير الأسم اللي بختاره حقها ما شيّ، يالله!!!· ؟ شقية: عيّن من الله خير يا بويه، ما يحتاي كل هالشِطْه!، ما يصير خاطرك إلا طيّب، الشور شورك والراي رايك ونحنا كلنا عيالك، واللي تامر به مره، البنت بنتك الله يسلمْك!· ؟ حنظل: هييه توّج حرمه وتعرفين السنع زين، ولَّه عباس مب مفتكر في شوره مره هال···؟! أنا بسميها إسم غاوي، تتنومس فيه هي وعْيالها بعد، إسم فنان وإن شاء الله بتكون شرات إسمها، ليش إنه أنا مسمنْها مب إنتو، واللي يمشي بشوركم عز الله ما فلح!!!· ؟ عباس وشقية : عمي، زين شو الإسم ما خبرتنا، نتريّاك؟!· ؟ حنظل: بسميها على اسم يدْتج الله يرحمها، ''الفطين''!··· الفطين عباس، بس هي الفطين مب إنته بوالعيس!!!· f_a0006@yahoo.com
جميع الحقوق محفوظة لمركز الاتحاد للأخبار 2024©