كل زين ينشاف بعين!

؟؟ شقية: ''في اتصال''، حبيبي مرْيت على محل العِبْي إتييب عْبيْي جاهزات من زمان، فديتك· لا تنسى، اليوم معزومة عند أم سلطان وأبغي ألبس عباه يديده! ؟ عباس: أي واحد فيهم ؟ إنتي ما خليتي حد ما فصْلتي عنده، كل يوم امْضويتْلج إسم وتربعين من محل لمحل يا شقية ألين دار راسي، ما أعرف شو تبون إنتوا يالحريم ما أدري، أي محل خلصينا ؟ ؟؟ شقية: عباس! هذا وقت سوالفك أحيْنه؟ إنت شو عرْفك فالموضة؟ سِر المحل اليديد إللي في شاطي الراحة، المحل فالطابق الثاني ما شي غيره هناك، حتى نسيت إسمه! ؟ عباس: الله وأكبر ف مول شاطي الراحة! وين طحتي عليه، متى سرتي هناك، لا، وبعد ما تعرفين إسمْه؟ ؟؟ شقية: هيه هناك، يعني وين ساير دبي؟ إلا شاطي الراحة، يا ابن الحلال سير هناك ويوم توصل كلمني إنت ما عليك، أوف شو هذا، أسميك ''حشْره''، بس خلاص ذليتنا على هالسْيره! ؟ عباس: إن شاء الله عمْوه، حاضرين أم العيس، حاضرين يا مدام حاضرين! لا بركتن فاليوم إللي طاحت فيه عباة الراس عن الراس، ألين النظر والعقل إحْتاس، كنا مفتكين من هالوذا كلّه! ؟؟ شقية ''في إتصال مع صديقتها'': اليوم بتشوفين، بكون مفاجأة العزيمة كلها، إصبري، بحْضر آخر وحدة عسْب كلهن ينشْن يسلمن عليّيه ويشوفن أناقتي والعباه اليديده، وإنتي تعرفيني زين أنا راعية ذوق ومزاج خاص، ما حد يماريني ولا ينافسني فيه! ؟ عباس: شقية، أنا وصلت المحل، هذا المحل فاضي ما عنده شي زين، وياب لي عبْييج، بس ما أدري، شْاك فالموضوع! هذيله هِنْ؟! إنتي تبين عِبْي وله لبس حفلة تنكريّة؟ أخاف يكون غيره مب هو إللي تقصدينه، متأكدة إنتي من المحل؟ ؟؟ شقية: لأ! هو ما شي غيره فالمول كلّه، شو تعلمنْي فيه؟ خبره عِبْي أم عيسى، ''قطر الندى'' و''شهرزاد'' و''عصفورة الظلام'' جاهزات، وشوفهن مظبْطهْن زين وله لا! ؟ عباس: شو؟ ما سمعت! شقية أنا فمحل عِبْي، إنتي امْطرشتنْي المكتبة العامة أشتريلج روايات عالمية وله شو السالفة خبريني؟ ؟؟ شقية: عباس ذليتني تراك من الصبح، إلا على هذا وين وشو هذا ووين هذاك وليش مب هني وكيف، بس يا إبن الحلال، ييب العِبْي وتعال، أنا إللي بلبسهن شو لك خص ف لبسي؟ ؟ عباس: مب يايزتلج الرمْسه هاااا! إلا لي خص ونص! إنتي مب ما خذه قوطي حتى تقولين مالي خص فيج ولا في لبسج تسمعين؟ كل يوم مشرقة ومغربه، من محل لمْحل، ما خليتي خنشوش إلا وسرتيله عسْب هالعباه، العباه للستر مب للعرض، إلا فصوص، وفتحات وما أدري شو، وسترش ومْخَصْر وامْطرز على الظهر واليناب، ومن فوق ومن تحت، غير الأسامي كل يوم شي ظاهر، إلاّ الفراشة، إلاّ الوطواط، إلاّ الخفْاشة، ومب بعيد أحينه إتْيينا العنْسلانه وباجر بعد بتْطيح وراها الخنفسانه والجرادة، ما خلوّا هالملاعيين من عايلة الزواحف والحشرات شي مول! قاصيّن عليكم كل يوم بشْي، ولاعنين أبو خامس الرياييل هالمساكين بدفع البيزات، ما غير هات وهات، إدفع إدفع، يا ليت على شي فيه فايدة، إلا على هالعنقاش والكلام الفاضي! ؟؟ شقية: يعني شو ما بتيبْهن؟ ؟ عباس: لأ! وغير عباة الراس الأولية والعباه الساده ما شي، وعند هذا مسَود الويه، بفصْل لج عشر عِبْي أحينه يداد غير هذيلاك إللي مسويتنهن عنده، مالج حايه فيهن الغالية، ما عليج من سوالف الحريم، و''كل زين ينشاف بعين'' فهمتي؟ وغير هذا ما يمشي عندي أم العيس! ؟؟ شقية: فديت بو العيس الغالي، ''إيه ده يا خواتي ده، متجَوزْه أسد أسد يا خواتي أسد''؟ ؟ عباس: هيييه! توْج تعرفين! ؟ همسه: ''الزين ولو هو زين، ومكشوف، أرجوك يا صاحبي لا تقرْب ولا تشوف''! فاطمة اللامي f_a6000@yahoo.com