10 يناير 2011 00:02
فطوم: هاي الكورة،، ما وراها إلا المشاكل،، كاهم الاخوان اتضاربو بسبتها.
أم صويلح: سبحان الله،، حتى يوم اتكلمتي في الكورة فكرتي في الشر والنكد!
سلامة: ما فهمت يدووه،، عن شوو ترمس الوالدة؟
أم صويلح: ماله داعي تعرفين،، سوالف مالها معنى.
فطوم: والله،، صدق مالها معنى،، يوم إنها مب على مزاجج تقولين مالها معنى.
سلامة: شو السالفة يدووه؟
فطوم: تعالي بخبرج.
أم صويلح: قومي عنها،، إنتي مثل الجرايد الصفرا،، تحب اللغط والدسائس،، تعالي أنا بقولج السالفة بدون توابل الصحف ومن مصدر موثوق.
فطوم: مصدر موثوق،، أونج!!
أم صويلح: منتخب الكويت محتج ع اسلوب التحكيم في مباراته مع الصين، ويقول إن الحكم ظلمه،، وبس.
فطوم: وبس!! قولي للبنيه الصدق،، قولي لها كيف هالكورة تخرب بين الإخوان.
أم صويلح: ما إستوى شي،، انتو فهمتوا السالفة غلط،، المباراة مالها علاقة بانتخابات المكتب التنفيذي للاتحاد الآسيوي.
سلامة: انتخابات!!
أم صويلح: ما إستوى شي،، انتخابات،، والكل يزعل فيها يوم يخسر.
سلامة: بعدني ما فهمت شي.
فطوم: يدتج تراوغ،، الجماعة اتضاربو بسبب فوز ناس وخسارة ناس في انتخابات الاتحاد الآسيوي، وانتقاما من موقف الكويتيين في الانتخابات يقولون إن بن همام قال للحكم الاسترالي حط ع الكويتين في المباراة وخسرهم،، والحين الكويتيين بينسحبون من البطولة.
أم صويلح: اقولج،، مالت عليج،، صخي واستريحي احسن لج،، الكويت باقية،، ووفدهم نفى هالاشاعة السخيفة، وبن همام أكبر من هالخراط.
سلامة: الحمدلله،، أنا بعد أقول السالفة مو ناقصة،، كفاية الهزايم المتلاحقة للفرق العربية، كان الواحد خاطره ياكل منسف اليوم إحتفالا بفوز الأردن.
أم صويلح: هي والله،، عاد أنا اتخبل ع هالأكلة. وين بي بي سيري ازقريها،، خلها تسوي لنا منسف.
فطوم: تحلمون بي بي تسوي لكم شي أحين،، الحلوة مشغولة بربعها اليوم، من الصبح تسوي في السنبوسة والباكورة.
سلامة: ليش،، منو صايم؟
أم صويلح: ههههااااي،، وحليلها،، اليوم المنتخب الهندي بيلعب،، اليوم الهنود،، يا عرس،، يا عزى.