الفرق بينا وبينهم

سلامة: شي،، والله شي يعني أنا ما ضن حد من رابطات مشجعينا يقدر يسوي جي!! أم صويلح: عادي.. سلامة: كيف عادي،، هالارجنتينيين والاسبان خبال،، شلوا الدنيا،، اربع حبات بنادول ما خوزت الصداع من راسي لحين. أم صويلح: امبلا يقدرون يسوون أكثر،، لكنكم انتم الشباب تتخبلون علي أي شي يي من الأجانب. سلامة: حرام يدووه،، ليش جي تقولين؟ أم صويلح: أسألي عمرج،، أنتي أصلا ما تابعتي مباراة كاملة مثل الأوادم،، كيف عيل تعرفين تقارنين بين مشجعينا ومشجعينهم. سلامة: يدووه،، الله يهداج، صج ان الواحد لازم يحابي عياله اكثر،، لكن بعد الحق ينقال. شفتي يوم لعب الأهلي،، كيف شجعوه؟! أم صويلح: ما قصروا وحليلهم،، كل رابطات المشجعين يت، وشجعت. سلامة: أونه،، انتي ما شفتي كل رابطة لابسة لبس ناديها،، ناس يغنوا للعيناوية وناس للشرجاوية، شو السالفة،، وين رايحين؟! الاجانب الي ترمسين عنهم،، يشلون الدنيا شل،، خمس الاف منهم،، تغني عن خمستعش ألف واحد يالس في المدرجات. لو يطالعون المباراة من التلفزيون،، بيكون أحسن. أم صويلح: الواحد ما يبغي يعلق،، لكن هالغلطه ما بتتكرر في المونديال الياي انشالله. سلامة: وايد اشيا المفروض ما تتكرر. أم صويلح: ماحد يتعلم بلاش. سلامة: يدووه ليش احسج محبطة.. وات هابن ويذ يو؟ أم صويلح: ردينا علي المصاخة،، مو قلنا انجليزي لااااا. (تدخل فطوم) فطوم: يعني انتي حاشرتنا بهالأكل الغريب من الارجنتين واسبانيا ومدري وين بعد،، وتشتطين يوم البنية ترمس انجليزي؟! شو هاااا. سلامة: امييه،، حرام ودري يدووه،، بروحها ضايجة! فطوم: منو ضايج،، معقووولة؟! بسم الله عليج شو ياج؟ أم صويلح: جي ياسلامة،، تخلين امج تشمت فيني؟! فطوم: والله مب شمتانة،، شكلج صدق يكسر الخاطر،، شو ياج يا خالتي،، وت هابن ويذ يووو؟؟!!!