شو الي صار؟!!

فطوم: تو الناس،، بعده العصر ما أذن، جان ردقدتي لين المغرب. أم صويلح: بي بييييي،، وين القهوة،، راسي يعورني،، ومب متحملة حد. فطوم: بالعدال على عمرج،، أحين انا الي معورة راسج،، هذا من سهر الليالي،، بذمتج لو أنا الي داشة البيت الساعة ثلاث مثلج، كان سكتي عني. أم صويلح: لو بتسوينها،، وبتتأخرين لهالوقت انصحج من أحين تردين بيت أهلج. فطوم: شو هالازدواجية في التعامل؟! أم صويلح: سيري اتشكي علي في لاهاي. فطوم: لا،، انتي سيري اتشكي على حكم مباراتكم أمس. أم صويلح: شووو تقصدين؟! سلامة: صبحكم الله بالخير،، من الصبح تتناجرون،، ماشالله عليكم. فطوم: وأنتي بعد مثل يدتج،، أي صباح،، أحين بيأذن العصر. سلامة: اميييه،، شو بلاج،، أنتي تعرفين متى رقدنا امس؟ فطوم: اعرف،، مو جنه انا اللي بطلت لكم الباب،، حتى أبوج ما حد، بيت الخبايل عافاني الله. بي بي: ماما هاي قهوه،، ما يريد ياكل؟! أم صويلح: أحس عمري شبعااااانه،، ما أدري ليش، هذا وانا مب متعشية. فطوم: ياترى هاي الحالة من الفرح ولا الحسرة؟ أم صويلح: لشو الحسرة،، نظمنا أحلى بطولة. فطوم: اونج تغايضيني،، شفت ها كله في التيلفزيون،، احلى لقطة يوم سوو شكل الكورة بالشمسيات. أم صويلح: اهاااا،، عيل تابعتي المباريات! ومسويه عمرج مب مهتمة! فطوم: أكيد مهتمة،، لكن مب خبلة،، ارد البيت عقب ثلاث الفجر. سلامة: اميييه مب نحن ارواحنا خارج،، كل العالم كان مشتط؛؛ ما شفتي حمود وشمــوه وخـالهم عبـود،، كــل الفـريج كان في المباراة. أم صويلح: بخبرج،، أنتي مو عندج دوام اليوم،، جي ما سرتي؟! فطوم: مالي بارض. أم صويلح: مالج بارض ولا بغيتي تعرفين منا شو صار امس؟! الفضول بيطير من عيونج. سلامة: امييييه،، ترا الي شفتيه في التلفزيون غير الي نحن شفناه. فطوم: شو استوى قولوا؟ أم صويلح: مالي بارض ارمس احين. om.sweleh@gmail.com