الكاس لهم والشرف لنا

فطوم: الصراحة أنا قلت بتردين عقب الشوط الأول،، وبغيت اتصل بج عشان ويهج ما يعورج زيادة!

أم صويلح: لأول مرة في تاريخ البرشا يمر عليه مثل هالشوط،، ما يعرفون السبب مساكين،، أعوذ بالله من عينج.

فطوم: مب عيني،، هذا الدلع اللي حصلوه من عربنا هني،، دلع وطلعات وهدايا،، يقولج مودينلهم حلوى عماني في الشنغريلا.

أم صويلح: جي هم خبايل ياكلون أي شي يجيهم؟!

فطوم: العفو،، ماحد خبايل غيرنا،، تقصين علينا بهالأكلات العجيبة،، في هالمونديال، ما ودرتي قارة إلا وأكلتينا منها.

أم صويلح: بس تعرفين فعلا كانوا ثقال وايد في الشوط الأول،، ويوم فازوا،، جنه اول مرة يفوزن،، شفتي مدربهم «جوسيب غوارديولا» يوم صاح،، وحليله.

فطوم: صج خالتي،، شو سالفة هالمدرب؟

أم صويلح: شو سالفته بعد،، ودري الريال في حاله.

سلامة: امييه انا بخبرج بسالفته،، هذا الله يسلمج، هذا مدرب من ثلاث سنوات بس، كان يلعب من قبل في الاهلي القطري. بعده صغير عمره 38 سنة بس، وحصل للفريق على خمس بطولات.. تخيلي؟!

فطوم: وهذا كم ياخذ بعد؟

أم صويلح: حلفتج يا سلامة ما تقولين شي،، حرام عليج،، الولد بعده بادي حياته التدريبية.

فطوم: بالعكس عيني باردة،، حتى ميسي الي تقولين اني ناضرتنه ياب الجول بصدره،، أو مرة اشوف هدف جي.

أم صويلح: الله يرحم الريال.

فطوم: بس خلاص مصختوها تراكم. والحمدلله يوم انتهت هالصدعة.

أم صويلح: بالعكس،، الحين لازم تبدى الصدعة الصجية،، نتريا بطل الدوري الاماراتي،، نبي بطل طموحه ماله حد،، تراه بيلعب مع الكبارية السنة الياية.

فطوم: هييي،، عشان تطلعون من أول 90 دقيقة.
سلامة: لا اميييه،، ان شاء الله العين بيرفع راسنا وبيلعب في الربع النهائي في مونديال 2010.

أم صويلح: صخي ليسمعج حمود أحين ويعصب عليج،، الولد مراهن على نادي الوحدة يمثلنا في كاس الاندية الياي.

فطوم: هذا راي حمود،، ما عرفنا رايج يا أم صويلح،، أي فريق تشجعين؟

أم صويلح: أنا اشجع الإمارات، وكل من يمثلنا، وكل من يشرفنا بلعبه الحلو والنظيف.

om.sweleh@gmail.com