الخميس 28 مارس 2024 أبوظبي الإمارات
مواقيت الصلاة
أبرز الأخبار
عدد اليوم
عدد اليوم

يوميات عباس وشقية الحلم عيسى

يوميات عباس وشقية الحلم عيسى
16 نوفمبر 2008 01:10
عباس: شقية وين إنتي؟، إتصلي في عوّاس خليه إييني الميلس أحينه واييب اللاب توب ماله، أبغيه في شغل ضروري· ــ شقية : أحينه!، عيسى عنده تدريب فأكاديمية النادي، تدريبه هو يلعب ففريق الناشئين مال الكورة، إصبر ألين ما يرد الولد ويسويلك إللي تباه· ؟عباس: أي أكاديمية وأي كورة، أقولْج أبغيه فشغل ضروري تقوليلي كوره وما أعرف شو؟! ــ شقية: ولديه موهوب فديته، لا تخْرب عليه التمرين، قلتلك إصبر ما بقى شي على ردته من النادي الله يهديك، شو مستوي عليك، لازم إتشطْ الواحد عسْب حايتك، شو ما فيك صبر؟!· ؟عباس: أقولج إتصلي فيه، إتصلت فيه مسوَد الويه ما يرد، ما في غير إني أسير له هناك أصفعه جدام ربعه والمدرب ماله، وأخليه ما يسوى بيزه، وأتله من فانيلته وأييبه، مستويلي حضرته ''بيليه'' الملعون، ما يرد على إتصالي!· ــ شقية: تعال أخبرك، شو فيك على الولد؟!، الولد شاطر فدراسته، وبروحه أستاذ التربية الرياضية مرشْحنْه يدخل الأكاديمية يوم شافه يلعب زين ففريق المدرسة، ما تدري باجر ممكن يلعب فالمنتخب فديت روحه، وايه عني ما خلا من ذيك العوينات ولا من ذاك الطول يا ربي!· ؟عباس: ما حد بيخرب هذا الولد غيرج إنتي يا شقية، وبتشوفين إنه ما بيفلح لا في دراسة ولا في كورة، هذا زين إذا كمْل فمعهد التدريب المهني ونفع عمره !· ــ شقية: ما حد امكسّر مياديف هذا الولد غيرك إنته، تعال شوف باجي عيال الناس شو مسْوَين فأهلهم، إلا مظهريليهم قرون من سواياهم والمروكض وراهم من مخفر ألين مخفر، عيسى ما شي شراته عنْي أفداه، بس إنت اتيوز من امناشبك وياه وهو بخير· ؟عباس: أنا ؟، شو ثرني مسويله؟!، قلنالج إتصلي فيه خليه إييني أحينه أبغيه ضروري، أنا أبوه ولي حق عليه تفهمين، ما عندي كاني ماني، كورة وما أعرف شو، باجر ما بتنفعه الكورة، بيتكسّر علينا وله إييه واحد ايهْفه ابكوع يفقع عينه ويسير ولا كأنه مسوي شي، الواحد منهم يوم ما يروم يشوت الكورة شاتله لاعب، وانْتم نحن إندّور له على متبرع بصابونة ريل ولْه عين وبدون شبكية، و هذا إذا حصلناها بعد!!· ــ شقية: الله وأكبر عليك وعلى كلامك، شعنه تفاول على الولد، حد يرمس عن ولده جذيه؟!، حشا إنته مب أُبو!· ؟ عباس: شو قلت؟، أبغي مصلحته بس، هذا هو! ــ شقية: يوم إنك تريد مصلحة الولد، ليش مغصص عليه هااا؟!، الولد متفوق فدراسته و سلوكه فالمدرسة وفالبيت ومع ربعه زين والكل يشهد له، بس إنت إللي ما أدري شو بلاك عليه؟، بعدين التدريب فـ''الويك إند'' وما يتعارض مع دراسته، واليوم النوادي محتايه شباب موهوبين يتبنونهم حق الدوري وللمنتخب بعد، تدري اللعيبة الأجانب ييتهم مب سهلة ويكلفون وايد، واعيالنا ما ينقصهم شي بس شوية دعم وتدريب، وأبو يعرف ويقدْر موهبة ولده مثلك بالظبط!· ؟ عباس: ما شاالله مستويه محلله رياضية أم العيس وأنا ما أدري، وين ''يعقوب السعدي'' عنْج؟!· ــ شقية: لا تقول شي مول، إنت من الصبح حاشرني وصدعت لي راسي تراك من حنتْك، ممكن أعرف بشو تبغيه الولد·· ممكن تخبرني؟!· ؟ عباس: لا، بس بغيته يتأكد من مناقصة خبروني عنها الربع اليوم حق مصنع البيبسي، يقولون طالبين حديد خردة، قلت بوَدْي سيارة المزرعة وسيارة عمي حنظل وسيارة بيتنا بعد، كلها منتهية صلاحيتها، خلاص المرور بتحيلها على التقاعد السنه، قلت أحسن عن لا نبيعها بخسارة، ياخذها مصنع البيبسي يسويها قواطي مشروبات غازية !!!· ــ شقية: أقول لو تسير ترقد أبرك عن هالهذربان مالك باباتي!· ؟ عباس: أنا أقول جذيه بعد، يزاج الله خير، أحسنتِ!· ــ شقية: ما يعرف نفسه كثر ما أعرفه هالريّال!، هذا هو كلما يأشر السوق أحمر يعتفس علينا واتطيح فراس عواسّ هالمسكين، آخرتها بيشتغل فالقواطي بوالعيس، لو بعدنا ما نسينا نكبة مشروع المطاط الأخضر والكيوي انقول ما عليه، صدق ليقالوا ''نوم الظالم عبادة''!· ؟ همسة: ''لا تحرموا أبناءكم حق ممارسة هواياتهم ، وشاركوهم في اكتشافها وتنميتها قدر الإمكان ''· f_a6000@yahoo.com
جميع الحقوق محفوظة لمركز الاتحاد للأخبار 2024©