بعده .. فيه أمل

فطوم: شفتي يدتج اليوم،، ولا كنها بتموت أمس! سلامة: بعدها ميهودة،، ولا لقمة كلتها من الصبح. فطوم: عادي يدتج،، بتيلس اسبوع بدون أكل،، هاذول مال أول صحتهم غير،، مب مثلنا. سلامة: بس الوالدة مب زين عليها،، يمكن تتدهور صحتها أكثر! فطوم: ما بين عليها أى عوارض،، شفتيها أمس،، تتابع المباريات من قناه لقناه ولا كنه فيها شي. سلامة: أي مباريات،، أمس الإمارات لعبت؟! فطوم: لا لا انتم بعدكم،، يدتج أمس تتابع مباريات الاردن وسوريا واليابان والسعودية،، ويالسة تحسب وتجمع وتطرح،، صدق حرمة خبلة. (تدخل أم صويلح) أم صويلح: أكيد يافطوم ترمسين عني،، أدري فيج،، شووه،، ما عندج شغل غيري؟. فطوم: شفتي ياسلامة!! هاي يدتج الميهودة. سلامة: يدووه،، صدق أمس تابعتي المباريتين؟ أم صويلح: أكيد،، مو عرب وخليجيين يلعبون،، لازم نشوف وين سايرين الجماعة. فطوم: الحمدلله،، يعني خلاص،، قطعتي الأمل في منتخب الإمارات؟ أم صويلح: قطعو راسج قولي آمين،، ليش اقطع الأمل،، بعده جدامنا فرصة،، وبإذن الله البطولة لنا. فطوم: هاااهااااي،، إنتي عايشة الوهم. سلامة: لحظة لحظة الوالدة،، صدق يدووه بعده عندنا فرصة؟ أم صويلح: هي بعده عندنا فرصة،، منتخبنا قوي ويستاهل الصعود. فطوم: خل عنج هالرمسة الي مالها طعم،، كيف لكم فرصة عقب ما هزموكم العراقيين هزيمة نكراء!. أم صويلح: نحن ماحد هزمنا،، رواحنا دخلنا في اعمارنا الجول. فطوم: ومستانسة بعد!! سلامة: صبري الوالدة،، قولي يدووه،، كيف جدامنا فرصة للتأهل؟ أم صويلح: نحن بنلعب باجر مع إيران،، وبنفوز عليهم 3 صفر،، وكوريا الشمالية بتفوز على العراق،، وبهالطريقة بنتأهل للدور الثاني. سلامة: صدق يدووه؟! فطوم: طع هاي!! بي بي: زين زين ماما،، حساب مضبوووط،، ومنتخب الهند،، شو حسابات مال صعود. أم صويلح: عاد هذا حسابه،، يوم الحساب.