يالله تلهمني الجواب إذا عظم هول السؤال *** وانك توفّقني اكون اليوم خير الناطقين
انا امام كبار من خلّوا الرقاب النا طوال *** وكبارنا وديارنا ماهوب للمستشّرقين
أدرى بهم من هو ربا بين السواحل والرّمال *** مرّن عليه سمان وعجاف اليالي والسّنين
هيّا يالاعلام الخليجي بثّني عبر الارسال *** شاعر واذا عاسمني المنبر اعرف اييه وين
لان المقام كبير وكبار المقام الهم مقال *** والشعر له مزمل وله ململ وله ملية يدين
الله يديم العز نحنا من احتفال الى احتفال *** والله يحفظ بلادنا من كيد يد وشر عين
ضيف البلد تنهضله اعلام البلد بالابتهال *** ضيف البلد ماهوب من بعض الضيوف العابرين
ضيف البلد سلمان من قاد المزن يالين سال *** والشاهد الله يالسّليل العدل انّا معيّدين
وحسب العوايد والسلوم اللي ربت فيها الاجيال *** رحب خليفه ونايبه ورحب ولي العهد الأمين
حكّام لو مرّوا على جرهد مسايلها ذبال *** تعشب ولو هي ممحله محل راحات اليدين
ياخادم البيتين ياعز العرب في كل حال *** ياخادم البيتين ياقبلة انظار المسلمين
ياخادم البيتين ياخازم عدوّه يوم عال *** ياخادم البيتين يامينا سلام الخايفين
نفرح بشوفك في وطنا وشوفك راس مال *** ومكانتك تسعى مابين قلوبنا يامواطنين
لقلوب خصبة طيب لك مركا ولك فيها ظلال *** مانفترق ابداً وياكم مثل ماخشمٍ وعين
انهوز ونروز الطوال ولاندنّق للثقال *** إنشلّها واعضودنا صلبة ونحنا واقفين
ثرنا ومزعنا صفحة الحوثي وسكّرنا السجال *** حتى ومزعنا صفحة الباطل من المستكبرين
يوم انتفكّر في الدقاق اللي يضرّن في الاجلال *** والنازحين اللي تطالب في حقوق الوارثين
ويوم انتفكّر فالحرام اللي منابيته حلال *** آفات الارياء واستبدّت في عقول الغافلين
أقول ليش البيت يلعب فيه عاصوف الشمال *** وليش الاطناب مترّكه ماوثّقت في الأرض زين
والعله اللي تدعي الاصحاح في حالة هزال ***قمنا نكمّدها وهي تبغي بتر ع المفصلين
نحنا بلانا من يخيط الحق بخيوط الظلال *** ياما ظلال اتكسرت منّه قلوب الوالدين
يا اهل الصدور اللي طوت من كل زين وطيب فال *** نحنا بلانا من صدور امشحّنة من كل شين
اللي تواجهنا بوجه سمح والداخل اعلال *** نحنا نعرف الوارم المعتل ونعرف السمين
يامن تنبّش في صدر أرض الخليج من الخبال *** صدر الخليج الله خلق له للمداحم منكبين
اقولها والصدق والواضح خلي من الجدال *** والساحه القشرا على ميعاد بالخبر اليقين
ياسيدي ارجوك قدر من ولدك الانفعال *** انا خليجي والخليجين مثلي ثايرين
اهل الخليج اللي يجيدون المنازل والقتال *** ع الحق ولاّ ع الردى لا والله إلا مكرمين
نحنا ماهوب دروع في يوم المصادم حن جبال *** وانته تعرف ان الجبال الله خلقها ماتلين
أرخ الحبال شويه النا ارخ الحبال *** قواتنا لمسلّحه نحنا كثرهم مرتين
ونحنا كثرنا مرتين ارجال في محزم رجال *** اعزاز والعزه تبارينا يسار ومن يمين
وانزل بشبانٍ تحالاهم على الظلع الشمال *** وجرّد على عدوانك الاّجرب رهيف الشذرتين
واللي نضح فيها جبين العود صعبه ماتطال *** وعيال زايد ند يوم يعد جيش المسلمين
وان جرّدوا سيف الغمامه من جفيره لاتسال *** ماهوب فقره يوم يقطع في المعارك فقرتين
اذا ضربنا ماتوثّمنا من اطراف الحلال *** ماهوب نحن اللي نساندها على المستضعفين
نحط ضرس الحرب عالشّارب يلين الدم سال *** للدم بنّه طيّبه لجل الوطن يالحاضرين
ولي هدّموا معقل هل العمه منكّست العقال *** ياما ثنوا له ساق يوم اتشلّلت ذيك اليدين
وان طوّفوا مِلس المناحر مقصّرت الاجال *** يدفع خصرهن لولبي ايلين يوقف الاكسجين
من يابهن يده وابوه اهل الرقاق من النصال *** وعلى بدنهن ياعلم زايد ياسيف الحرمين
إيحط شيخ إيران ويحط الملالي في ملال *** والله يأنّي صادق ان هازت نفوس العابثين
العز قوت الشعب والقايد مكانه بالرّجال *** ونحنا شباع من المعزه يوم شعبه جايعين
قولوا له ان كانك تبى تعرف موازينك تعال *** وخل الحسن في مرقده مستانس وخل الحسين