حان وقت التنظيف

أم صويلح: حياالله من يانا،، وينج يا أم عبدالله،، مطول الغيبات،، صراحة فقدناج هالفترة. أم عبدالله: يا أختي قلت لش من قبل،، هذا الولد عبدالله،، يشتيني أخطب له،، وياريتني ما سافرت، لا تابعنا البطولة ولا جوزنا الولد. أم صويلح: أفااا،، ليش؟ أم عبدالله: يختي يتدلع،، مرة يقول اشتيها شقرة،، نخطب له الشقره،، يغير رأيه و يقول لا،، اشتيها سمرة،، يختي جنني. أم صويلح: حالج مب أخس عن حالنا،، حتى هني،، جابو لنا الخبال،، حسبي الله عليهم. أم عبدالله: والله أني تابعت المباريات الثلاث،، مش فاهمة إيش جرى لكم،، عين مصلتش على النبي،، نفس الي جا نتهبنا اليمني في خليجي 20. أم صويلح: عاد لا تزعليني منج يا أم عبدالله،، وين منتخبكم ووين منتخبنا؟! الظاهر إنج ما شفتي مبارياتنا مع أوزباكستان والعراق،، كانو اسود؟ أم عبد الله: النتيجة الأهم يا أم صويلح،، لا تقولي لي مستوى وأداء،، كل هذا يتنسى،، ما يبقاش غير النتائج،، وإنتم الصراحة في ذيل مجموعتكم بأربع أجوال فيكم ونقطة لكم،، حتى الهنود جابو أجوال في مجموعتهم. أم صويلح: شو هالكلام يا أم عبدالله،، إنتي جاية تواسيني ولا تنكدي علي؟! أم عبدالله: يا حبيبتي،، صديقك من صدقك،، شوفو لكم صرفة،، وضعكم صعب. أم صويلح: بس وضعنا الي صعب،، كل العرب المشاركين في البطولة،، كلهم وضعهم صعب،، فشلونا والله. أم عبدالله: أقولش،، المنطقة كلها تشتي تنظيف. أم صويلح: صدقتي والله،، المنطقة كلها محتاجة تنظيف. أم عبدالله: أولهم هذا الكلتشي الي عندكم. أم صويلح: كلتشي!! منو كلتشي؟! أم عبدالله: مدربكم. أم صويلح: تقصدين كاتانيتش،، ههههاهااي،، وليش معصبة عليه؟! أم عبدالله: ايش،، نسيتي لما أجا اليمن إيش قال؟ أم صويلح: ما اذكر،، شو قال؟ أم عبدالله: قال.. ارفض السياحة في اليمن،، على ايش شايف نفسه،، حتى ولا بطولة جاب لكم. أم صويلح: فعلا،، معاج حق،، المنطقة كلها محتاجة تنظيف.