24 يناير 2011 22:05
أم صويلح: اليوم مباريتين.. بيلعبون اوزباكستان واستراليا.. واليابان وكوريا الجنوبية.
فطوم: وشوه يعني؟
سلامة: خلاص الوالدة.. اليوم بنعرف منو بيلعب في المباراة النهائية.
فطوم: وخير ياطير.
أم صويلح: طيرج ملك الموت من جدامي.. قولي آآآمين.
فطوم: يعني بتذبحيني عشان مبارياتج هاي.. هذا ولا فريق عربي يلعب فيهم.. عيل لو تلعبون في النهائي.. شو بتسويين فيني؟!
أم صويلح: تعرفين يا النحسة.. هاي أول مرة في تاريخ كأس آسيا من عام 1972 ما يلعب فريق عربي علي الربع النهائي؟! فعلا فيه نحاسة في السالفة!
فطوم: ولا نحاسة ولا شي.. انتم أصلا مالكم في البطولات.. حدكم الأندية،، تغلبون بعضكم.
أم صويلح: وانتي تحرين هالدول الي طلعت للنهائي صاحبة بطولات..هاي أوزباكستان أول مرة توصل لهالمستوى.. أصلا هم مصنفيهان في المركز الـ 108 في التصنيف العالمي لمنتخبات العالم.
..فطوم: اوزباكستان هايوول فازو عليكم بعد!!
أم صويلح: لاااا.. تعادلنا وياهم في أول مباريات مجموعتنا.
فطوم: تقولينها بكل فخر.
أم صويلح: تبغيني اصيح مثلا؟!
سلامة: مباراتنا كانت حلوة وايد ويااهم.
بي بي: ماما.. هاي أوزوستان وين؟!
سلامة: ههههاااي.. اوزباكستان.. مو اوزستان!
أم صويلح: فهميها ولا تضحكين عليها.
سلامة يا بي بي.. هالبطولة بكبرها لقارة آسيا.. يعني وين بتكون اوزباكستان؟؟ في امريكا الجنوبية مثل.. هههاهههاااي.
أم صويلح: ليش.. استراليا في قارة أسيا مثلا؟!