أم صويلح: بسك ضرابة، خلاص، ما كانت سيرة هاي، يعني شو استوى؟!
صالح ''الابن'': ما يصير يا أمي تسيرين بالدسة، أحين لو استوى بج شي·
أم صويلح: شو بيصير يعني الله يهداك أكثر عن اللي صار·
صالح: يعني مب كفاية لفيتي حول الاستاد مرتين وضيعتي الدريول وما دليتي وين السيارة··
بي بي: هي والله بابا، ريول مال انا وايد عورتني، عيل كيف ماما!
صالح: أنت تشب، كله منج·
أم صويلح: لا تزاعج عليها، كله منك إنت، من متى قايلتلك على الدش المخترب؟!
صالح: خلاص يا امي، احين بييب الفني يضبط الدش· بس بعد، تراني متضايق، كيف تسيرين بالدسة·
أم صويلح: خل عنك، أنت إلا محتشر عشان ما دخلوك، وما حصلت مكان، ولا لحقت على عرض ولا على مباراة·
فطوم (زوجة الابن): مبروك عليج العرض والمباراة·
أم صويلح: شو تقصدين، هاااا أشوفج تطنزين· بصراحة العرض كان غاوي وعرض العسكر يخبل، والفرسان على الخيول كانوا روعة، أنت ما شفتي، لا تتكلمين·
فطوم (زوجة الابن): والمباراة بعد كانت حلوة، ويه ''بي بي'' كان وايد حلو على لاعبين منتخبنا·
أم صويلح: إنت ليش كله حاطة دوبج بدوب هالفقيرة، حسبي الله عليج·
فطوم: منو هاي اللي أحط دوبي بدوبها، هاي اللي قاصر بعد!!
أم صويلح: عيل مقهورة لأنج ما حضرتي·
فطوم: أنا إليي مقهورة؟؟!!
أم صويلح: صدق نحن انقهرنا واااااااايد، بس استانسنا بعد،، كفاية علي شوفت زكية، فديت عمرها بسير اعزمها على العشا عندنا اليوم·